Mehmet Aslano ke 5 lajê ci û birazayêk ci grevê vêşanîye de yî va: “No welat de heq û huqûq çin o. Dinya xo kerrî ronaya. Tena ma wazenê hukmat vengê ma bieşnao.”
Çalakîyê grevê vêşanîye ke bi serkêşîya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî ya verên Leyla Guvena ke seba wedarnayîşê tecrîdê serê rayberê PKKyî Abdullah Ocalanî dîyabî dest pêkerdene û 157 rojî yo xover dana, bêmaben dewam kenî. Badê Guvene çalakîyê grevê vêşanîye vilayê zîndan û teberê welatî zî bî.
5 ferdê keyeyê Aslanî 44 rojî yo ke Zîndanê Tîpa Tyî yê Riha de seba wedarnayîşê tecrîdê serê Rayberê PKKyî Abdullah Ocalanî grevê vêşanîye de yî. Mehmet Aslano (76) ke lajê ci Fevzî, Mehmet, Omer, Kasim, Halîl û birazayê ci Şerîf Aslanî 6 aşmî yo zîndan de grevê vêşanîye de yî.
Ganî verê ke çîyêko xirab biqewimîyo gam bêro eştene
Aslanî destpêkê qiseykerdişê xo de ard ziwan ke wexto ke babete bena kurd her kes xo kerr û lalî roneno û wina dewam kerd: “Domanê mi hemverê zilmî de têkoşîn danî. Waştişê înan rijnayîşê dewlete nîyo. Waştişê domanê mi û pêroyê domanê kurdan yew î. Ê edalet wazenî. Labelê dewlete îxanetê kurdan kena. Verê çimanê mi de îşkence bi doman û torinanê mi kerdî. Pê luleya çekî îşkence kerdî û ez nêewtanaya ke çîyêk bikera. Nika pêro zî grevê vêşanîye de yî. Verê ke çîyêko xirab biqewimîyo û çîyêk bêro serê înan, ganî gamêk bêro eştene û waştişê înan bêro qebûlkerdene.”
No welat de heq û huqûq çin o
Aslanî tewr peynî bale ant rewşa hemsereka KCDyî û parlementera verên ya HDPyî ya Colemêrgî Leyla Guvene ser û va: “Leyla hemverê zilmî de îdare nêkerd. Seba ke welat de heq û huqûq çin î, Guvene kewt grevê vêşanîye. Wazenê ke kurd û tirk şer bikerî. No zilm o û nîno qebûlkerdene. Domanê ma têşan û vêşan î. No welat de heq û huqûq çin o. Dinya xo kerrî ronaya. Tena ma wazenê hukmat vengê ma bieşnao.” RIHA
