Rejîma Îranê ji bo destlatdariya xwe ya paşverû û olperest bidomîne serî li cezayê darvekirinê dide. Di van demên dawî de cezayê darvekirinê li gelek jinên berxwedêr birî. Ji van yek jê rojnamevan û girtiya siyasî Pexşan Ezîzî ye. Nerazîbûnên li hemberî cezayê darvekirina Pexşan Ezîzî her ku diçin zêde dibe. Divê çarçoveyê de 68 rêxistinên Mafên Mirovan, aktivîstên jin ên Rojhilatê Kurdistan û Îranê, daxuyaniyek hevpar parevekirin.
Di daxuyaniyê de, bang li civaka navneteweyî, navend, rêxistinên yasayî hate kirin ku ji bo rawestandina cezayê darvekirinê yê ji bo Pexşan Ezîzî hatî dayîn, gavên cidî bavêjin.
Di berdewamiya daxuyaniyê de ev tişt hatin gotin: “Pexşan Ezîzî jiyana xwe ji bo parastina jinan, girîngîdana bi wekheviya di civakê de xerc kir. Darvekirina Pexşan Ezîzî wê li ser mirovahiyê bibe rûpelek reş.”
Hêjayî bi bîrxistinê ye roja 8’ê Çileyê parêzerê girtiya siyasî Pexşan Ezîzî, Emîr Reîsiyan ragihand ku Dadgeha Bilind a Îranê cezayê darvekirinê yê ku li Pexşan Ezîzî hatibû birîn erê kiriye. Her wiha diyarkir belgeyên ku wan ji bo parastina Pexşan Ezîzî pêşkêş kiribûn, ji aliyê dadgehê ve hatine redkirin.
