Li Girtîgeha Tîpa D a Amedê duh 7 girtî bi hinceta ‘ewlehiyê’ sewqî girtîgehên cuda hatin kirin. Hat diyarkirin ku girtiyê bi navê Şaban Kaygusuz ku destek û lingekî wî nîne, ji ber lêgerîna tazî qebûl nekiriye li Girtîgeha Tîpa T a Hejmara Yek a Bunyana Kayseriyê sewqî wir hatiye kirin û 5 gardiyanan lê daye. Garîp Kaya û Îsmaîl Aslan sewqî Girtîgeha Tîpa S a Antalyayê hatin kirin, Mehmet Ayaz sewqî Girtîgeha Tîpa T a Tokatê, Muhammed Peksoy sewqî Girtîgeha Tîpa T a Ereglî ya Konyayê, Nîhat Aktaş sewqî Gîrtîgeha Tîpa T Hejmar 2 ya Bunyana Kayseriyê hatin kirin.
Li aliyê din malbatan diyar kir ku van rojan li girtîgehê her roj lêgerîn tên kirin, di encama lêgerînan de gardiyan dest danîn ser pirtûk û lênûskan û kelûpelên wan tên belavkirin. Malbat diyar dikin ku her tim bi vî awayî mudaxile tê kirin û ji ber pirtûk, lênûsk û destnivîsan cezayê dîsîplînê didin girtiyan. Di encama cezayên dîsîplînê jî lijneya ‘halê baş’ raporên neyînî dide girtiyan. AMED
