21ê Sibate Roja Ziwanê Dayîke ya Dinya de kovarêka bi ziwanê zazakî ya newe vejîyena. Kovare armanc kena ke bi ziwanê dayîke lîteraturê psîkolojî û perwerdeyê taybetî amade bikera. Amadekarîya kovare aşmanê verênan ê serra 2020î de dest pêkerd. Hûmara yewîne ya kovare de derheqê babetanê sey otîzm, sendromê downî, anksîyete û şîzofrenî de tay meqale û açarnayîşî estê. La yeno waştene ke hûmaranê bînan de ca bidîyo tewir bi tewir nuşteyanê bînan zî.
Amadekarê kovarî dîyar kenê ke Ehmedê Xasî ra nata ê kesanê ke bi zazakî nuşt verî xo îfade kerd ke çira bi zazakî nusenê û wina vatî: “Çunke bi zazakî nuştiş xeylêk wext sey ” tewirêkê neweperestî” seke vera rewşe îtîraz bi. La ewro bi zazakî nuştiş mîyanê zazayan de sey tradîsyonêk o. Ewro bi ziwanê standartî û bi ziwanê fekkî kitab û kovarî weşanîyenê, ciwan û kokimî bi zazakî nusenê û zazakî her platform de xo mojnena. Ma hînî eşkenê xo biresnê lîteraturêkê weşî. Ma sey komêka psîkolog û mamostayanê perwerdeyê taybetî hedef kenê ke warê xo de na xabeta kovare bi hawayêkê sîstematîkî bîyarê ca û xebata xo bikerê mende. Seba ke no proses de paşt dayo ma, ma Enstîtuya Kurdî ra zî teşekûr kenî. Kesê ke wazenê kovare de ca bigêrê eşkenê emaîl û hesabanê medyaya komelkî ra xo biresnê ma. Qala peyen ma bi çoş û heyecan mîzgînî danî ke kovara ma 21ê Sibate Roja Ziwanê Dayîke ya Dinya de yena şima ver.”
Cernot: Hesabê twîtter: @MezgPsyche
Înstagram: mezgpsyche
Gmaîl: psychemezg@gmail.com
Çime: Rojnameyê Xwebûn
