Salîh Gergerlîogluyî da zanayene ke semedê prosesê keye de mendişî ê têna eşkenê pêvînayîşê telefonî bikerê û vat: ”HDP xeberanê serê babîyê mi kom kenê û pê mektubêke erşaweno zîndanî. La semedo ke mîyanê nê xeberan de xebera Ajansê Mezopotamya esta mektube nêdîyena babîyê mi. Reyna Zîndanê Sîncanî de îdare destûr nêdano pêro kanalanê televîzyonî la verî dayêne. Mengêke de têna seba erşawitişê 12 kitaban heqê ma esto la babîyê mi mîyanê 20 rojan de cara 9 kitabî wendî, ez vana qey kitabxaneyê zîndanî de zî hertim kitab nêdîyeno. Babîyê mi de nêweşîya romatîzma esta coka ma waşt bere bierşawê ci la bere zî pê bahaneyêke nêameye qebulkerdene. Hucreyê babîyê mi zî tîje nêvîneno. Kesêk zî babîyê mi rê estareyê dengizî erşawitbi ke wa tira vengê dengizî bieşnawo la îdareyî dest na ey ser zî. Zîndanan de merg esto, ez her roje vilabîyayîşê janê Korona ser o xeberan gêna. Xeylêk kesî mirenê la derdê îqtîdarî turîst ê.”
Omer Faruk Gergerlîogluyî kanalê xo yê bi nameyê OFGyî ra derheqê binpaykerdişanê heqanê merdiman de xeberî dayêne. Nika Salîh Gergerlîogluyî îdareyê kanalî girewt xo ser. Salîh Gergerlîogluyî vat: ”Ma wazenê xebatê babîyê mi wa dewam bikerê. Ma sey babîyê mi mexdûranê KHKyî ser o raporêk amade kenê û ma do nê raporî berê HDP û partîyanê bînan. Seba dewaya babîyê mi bira dewaya Enîs Berberogluyî eşkena biba mîsalêk. Ma nika pabeyê bira Mehkemeya Qanûnê Bingeyî yê. Hetê bînî ra HDPyî ra ber partîyê bînî vera na babete bêveng mendî. Ganî nê qisey bikerê. Rayîrê şiknayîşê na çerxe bêvengîye nê qiseykerdiş o.” Çime: Anf
