Tevgera Ciwanên Welatparêz ên Kurdistanê û Tevgera Jinên Ciwan ên Têkoşer ên başûrê Kurdsitanê bi hev re biryar dabûn ku li dijî êrîşên dewleta tirk a dagirker û hevkariya PDK’ê li Qendîlê çalakiya mertalên zindî pêk bînin. Bi vê armancê serê sibehê rêketin ku biçin Qendîlê. Lê li qezaya Şengeserê endamên tevgera ciwanan û gel ji aliyê hêzên asayîşê ve hatine rawestandin.
Ji ber ku ciwan di biryara xwe de bi israr bûn û ji ya xwe daneketin asayîşê êrîşê ciwanan kir, li ciwanan xist. Her wiha asayîşê bela xwe li çapemeniyê jî xist û li nûçegihanan da.
Koma Defend Kurdistan a ku dixwest piştgiriya çalakiyê bike jî ji aliyê asayîşê ve hat astengkirin. Çalakvanên ku hatine astengkirin li Şengeserê daxuyanî dan.
Li ser navê çalakvanan ciwanê bi navê Karwan Kelarî daxuyanî da û wiha got: “Me xwest li dijî dagirkeriya dewleta tirk biçîn Qendîlê û dest bi çalakiya mertalên zindî bikin. Lê asayîşê rê neda. Em vê helwesta asayîşê şermezar dikîn, em ê bi tu awayî li hemberî dagirkeriya dewleta tirk û êrişan bêdeng nemînin.”
Kelarî dawiyê de bang li hemû ciwanên Kurdistan û derveyî welat kir da ku tev li pêngava ‘Cenga Azadiyê’ bibin.
Piştî daxuyaniyê endamên Şandeya Aştiyê ku ji bo destekdayînê tevlî çalakiyê bibûn jî, axivîn û piştgiriya xwe anîn ziman. RAPERÎN
