Endamanê Komeleya Rojnamegeran a Dîcle-Firatî (DFG) û Platformê Rojnamegeran ê Cinîyan ê Mezopotamya (MGKP) seba 16 rojnamegeranê tepişteyan Amed, Wan û Mersîn de çalakîyî û rojnamegeran rê mektub, kitab û kartî erşawitî.
Amed
Endamanê DFG û MKGPyî verê Şubeyê PTTyî yê Yenîşehîrî de eşkerayîye daye. Vervatoxa HDPyî Ebru Gunaye û merdimê tepişteyan zî tewrê çalakîye bîyî. Eşkerayîye de ame vîrvistene ke 16 rojnamegerî (Mudira Jinnewsî Safîye Alagaş, Hemserekê DFGyî Serdar Altan, Edîtorê MA Azîz Oruç, Mudirê Karanê Nuşteyî yê Xwebûnî Mehmet Alî Ertaş û Zeynel Abîdîn Bulut, Omer Çelîk, Mazlum Dogan Guler, Îbrahîm Koyuncu, Neşe Toprak, Elîf Ungur, Abdurrahman Oncu, Suat Doguhan, Remzîye Temel, Ramazan Gecîken, Lezgîn Akdenîz û Mehmet Şahîn) seba karanê xo yê rojnamegerîye tepişîyayî. Eşkerayîye de ame waştene ke cade rojnamegerî bêrê veradayene û veng dîya ke wa her kes paştî bido rojnamegeran.
Gunaye zî eşkerayîye de qisey kerd îqtîdar rojnamegeranê kurdan ra qesas gêno. Gunaye vat: ”3 mengî yo derheqê rojnamegeran de îdîaname nêameyo amadekerdene. Nê embazê ma yê rojnamegerî serê rêçanê Apê Musa, Gurbetellî Ersoz, Metîn Goktepe de yê. Ê do vera tedayan çok nêşorê erdî ro. Rojnamegerîye sûc nîya, wa embazê ma vera bidîyê.”
Eşkerayîye ra dima rojnamegeranê tepişteyan rê kart, mektub û kitabî erşawîyayî.
Mersîn
Endamanê DFG û MKGPyî Şubeyê PTTyî yê Çarşiyî de kartî û kitabî erşawitî rojnamegeran û eşkerayîye daye. Wekîlê HDPyî Omer Ocalan, Hemsereka HDPyî ya Mersînî Bedrîye Kuş û îdarekarê ÎHDyî zî tewrê eşkerayîye bîyî. Rojnameger Mahmut Sonmezî eşkerayîye wende û waşt ke wa embazê înan vera bidîyê.
Wekîl Omer Ocalanî zî ard ziwan ke îqtîdar seba ke çapemenîya kurdan bêveng bikera her çi keno û vat ke nê rojnamegeranê tepişteyan gureyê xo ra ber çîyêk nêkerdo.
Wan
Endamanê DFG û MKGPyî Postaxaneyê Merkezê Wanî de rojnamegeran rê kart û kitabî erşawitî. Eşkerayîya ke ame waştene verê PTTyî de bêra kerdene, bi bahaneya qedexeyê walîtîye ameye astengkerdene. Çalakîye de seba azadîya rojnamegeran veng dîya. AMED
