Dima ke Erdogan weçînayîşanê serekkomarîye de reyna ser kewt, Almanya de komanê terefgîranê AKP-MHPyî nawnayîşî kerdbî û nê nawnayîşan de serebûtê şîdetî qewimîyabî. Wekîla Partîya Çepe Clara Bunger babete bi vernîyazêkê persî viste rojdemê Meclîsê Federalî. Clara Bunger pers kerd ke nê komê nîjadperestî yê radîkalî do bêrê qedexekerdene yan ney.
Nameyê hukmatî ser o Wezîra Karanê Zereyî 7ê hezîrane de cewab da vernîyazî û îdîa kerd ke nê komî asayîşê cuya kurdan û muxalîfanê tirkan ê Almanya gef nîyê. Wezîrîye îdîa kerd ke yewinanê asayîşî yew şîdetê înan qeyd nêkerdo û qedexekerdişê nê komanê nijadperestan ê radîkalan rojdemê înan de nîyo.
Wekîle Clara Bunger eşkerayîya Wezîra Karanê Zereyî rê nêrazîbîyayîşê xo mojna û pare kerd ke hukmatê Almanya seba ke Erdogan hêrs û aciz nêkero kurdan û muxalîfanê tirkan nêpaweno. Bungere vat: ”Seba ke ‘ulkucu’yî qedexe bibê ganî hînî Almanya de se bikerê? Ulkucuyî Almanya de koma tewr radîkale ya pîl a û sey Nazîyan tehlukeyîn a. Rixmo ke nê komê nîjadperestî bêrê qedexekerdene têgêrayîşê azadîye yê kurdan yeno krîmînalîzekerdene. Sîyasetmedaro kurd Kenan Ayaz Kibris de tepişîyayo û do eslîmê Almanya bêro kerdene. No zî mojneno ke Almanya xizmetê Erdoganî kena.”
Eqsê eşkerayîya Wezîrîya Karanê Zereyî, Dayîreyê Pawitişê Qanûnê Bingeyî (Îstîxbaratê Almanya) analîzêkê xo de da zanayene ke komê faşîstî yê tirkî serê asayîşê Almanya gefê pîlî yê. BERLIN
