Ciwanê kurdîstanijê ke Fransa de ciwîyenê şaristanê Marsilya de ameyî têhet û înan bi şîarê ”Vera qirkerdişê kulturelî xo rêxistin bikerê” bi kongreya xo ya yewine, ronîyayîşê rêxistina Ciwananê Kurdîstanijan ê Fransa (CFK) îlan kerd.
Kongre de bire dîyaye ke Meclîsê CFK 21 kesan ra bêro pê, koordînasyon 9 kesan ra bêro pê. Kongre de Defne û Azad bîyî Vervatoxê CFKyî. Kongre de erk dîya koordînasyon ke 6 mengan ra dima kongreya diyîne serûber bikero.
Kongre ra dima vervatoxan eşkerayîye daye çapemenîye.
Eşkerayîye de ame parekerdene ke kurdê ke bi seserran raştê qirkerdişan ameyê, xêrê têkoşînê PKK û Rayberê Şarê Kurdî Abdullah Ocalanî ra ewro eşkenê payan ser de vinderê. Ciwanan vat: ”Ma sey ciwananê dîaspora dîyar kenê ke do wayîrê kulturê xo û mîrasê têgêrayîşê azadîye û Rayber Apoyî bipawê. Vera qirkerdişê kulturelî ma do erkê xo bîyarê ca û rêxistinîya xo aver berê. Ma do seba azadîya Rayber Apoyî xebat û çalakîyanê xo tim bikerê. Ma venga pêro ciwananê kurdîstanijan danê ke bêrê ma pîya vera qirkerdişê kulturelî têkoşîn bikerê.” MARSILYA
