Hemsereka Pêroyî ya DEM Partî Tulay Hatîmogullariye heyetê xo reyde qezayê Bazarcix û Dîgorî zîyaret kerd û tewra akerdişê buroyanê weçînayîşan bîye. Serekwekîla Grûba DEM Partî Gulîstan Kiliç Koçyîgît, Wekîlê DEM Partî Yilmaz Hun, Namzedê Şaredarîya Qersî Arzu Savaş Derman û Kenan Karahanci zî mîyanê heyetî de bîyî.
Tulay Hatîmogullariye bernameyê Bazarcixî de xîtabê şarî kerd û ard ziwan ke DEM Partî hêvîya cinî û ciwanan a. Hemsereke pare kerd ke ê do pêro keyeyan ra bigêrê û qalê ci bikerê ke çira şar ganî raya bido înan.
Heyetî dima Dîgor zîyaret kerd. Şarî bi sloganan dekewtişê qeza de heyet pêşwazî kerd. Namzedê Şaredarîya Dîgorî Ulker Ozaditti û Adem Oyman zî heyetî reyde bîyî.
Hatîmogullariye bername de qisey kerd û bale anet qirkerdişê Dîgorî ser. Hatîmogullariye da zanayene ke ê do qetî rayîr nêdê qirkerdişanê winayênan. Hatîmogullariye bale ante tecrîdê vera Rayberê Şarê Kurdî Abdullah Ocalanî ser.
Hatîmogullariye dîyar kerd ke AKP-MHP dişmenê şaran, sîstemê hemserekîye û cinîyan o. Hatîmogullari vat: ”Ma do şaredarîyanê xo de qetîyen rayîr nêdê ferasetê dişmenîye. Ma do tim cinîyan rê paştî bidê, şaredarîyanê xo bi ziwanê dayîke xizmetan bidê. Ma do newe ra bi hawayêkê demokratîkî şaristanan awan bikerê.”
Heyet Dîgorî ra dima do derbazê Qaxizmanî bibo. QERS
