Bi armanca dabînkirina pêdiviyên bingehîn ji malbatên koçber ên ji kantona Efrîn û Şehbayê re yên ku tev li karwanên berê xwe dane kantona Tebqayê nebûne, Weqfa Jina Azd li Helebê li gorî derfetên xwe alîkarî pêşkêşî wan kirin. Weqfê betanî, isfinc û kel û pelên zivistanê li malbatên koçber belav kirin.
Li gorî çavdêrên li ser belavkirinê disekinin, dema bidawîbûna belavkirinê ne diyar e û dê heta tevahî malbat para xwe ji alîkariyan wergirin, bidome. Her wiha Weqfê di 14ˋê Kanûnê de jî alîkariyên xwarinê weke cil, paketên xwarinê bi taybet ên zarokan ên temenên wan di navbera salek û 8 salan de belav kiribû.
Li aliyekî din jî rêxistina NÛDEM a Amadekirin û Geşedanên Mirovî ya Astengdaran ciln zivistanê li 425 astengdarên li taxên Şêxmeqsûd û Eşrefiyê yên Helebê belav kirin. Rêxistinê alîkarî pêşkêşî zarokên temenên wan di navbera 5 heta 16 saliyê de kir.
Rêvebera rêxistinê Meryem Şêx Qember der barê palana rêxistinê ya belavkirina alîkariyan de got: “Me berê ji bo girtina hejmara astengdaran gerek pêk anîbû. Li gorî derfetên heyî me hewl da hin pêdiviyan ji astengdaran re pêşkêş bikin. Dê rêxistin navendeke dermankirina fîzîk û çalakiyên lîstokî veke.”
Rêxistinê ji 23ˋyê Kanûnê de dest bi belavkirina alîkariyan kiriye û dê heta tevahî astengdar para xwe wergerin, belavkirin bidome.
