Danişîna doza Hevşaredarê Bajarê Mezin ê Wanê Abdullah Zeydan li 5’emîn Dadgeha Cezayên Giran a Amedê hat lidarxistin û 3 sal û 9 meh cezayê hefsê li Zeydan hate birîn. Piştî biryarê, xelkê Wanê çû ber avahiya Şaredariya Bajarê Mezin. Bi hezaran welatiyên li pêşiya avahiya şaredariyê kom bûn dirûşmên “Abdullah Zeydan rûmeta me ye”, “Neslîhan Şedal rûmeta me ye” berz dikin. Hêj niha jî gel ber bi avahiya şaredariyê ve diherike. Hejmara welatiyan her ku diçe zêde dibe û derdora avahiya şaredariyê jî ji hêla polîsan ve hate dorpêçkirin.
Hevşaredar Abdullah Zeydan têkildarî cezayê hatiye dayin axivî û wiha got: “Kesên ku di 31’ê Adarê de nekarîn gelê Wanê bi rêyên demokratîk têk bibin, bi rêya kompasên darazê, bi xefikên darazê careke din îradeya xelkê Wanê xesp dikin. Ji bo me tu hukmê vê biryarê nîne û biryareke siyasî ye. Îfadeyên leşkeran û rapora pisporan jî me mafdar derdixîne lê biryareke siyasî hate dayin. Ev biryar, li ser fermanê hate dayin. Ev biryar, hewldana xespkirina vîna milyonek û 200 hezar welatiyên Wanê ye. Li dijî vê em ê heta dawiyê demokrasî, edalet û îradeya gel biparêzin.”
