Qeymeqamê Mîdyatê Huseyîn Tekîn ku weke endamê AKP-MHP’ê dixebite, ji bo pêşîlêgirtina xebatên hilbijartinê yên HDP’ê, nehişt ku buroya hilbijartinê li navçeyê bê vekirin
Ji bo hilbijartinên rêveberiyên herêmî ku dê di 31’ê adara îsal de bên lidarxistin tenê 40 roj man. Hikûmeta AKP-MHP’ê ku li bakurê Kurdistanê û Tirkiyeyê her ku diçe dengê xwe winda dike, bi hîle, zext, zordarî, tundî, girtin, hilbijêrên sexte û hwd. hewl dide ku şaredariyan bi dest bixe.
Bi taybet jî tifaqa AKP-MHP’ê li bajarên bakurê Kurdistanê zexteke giran û hîleyên cur bi cur dikin. Di dema pêkanîna van binpêkirinan de walî û qeymeqamên li Bakur jî weke endamên rêxistinên AKP û MHP’ê tevdigerin. Yek ji mînaka vê jî li navçeya Midyad a Mêrdînê derket holê. Buroya hilbijartinê ya Partiya Herêmên Demokratîk (HDP) ku dê duh li kolana Seyfettîn Guneşten a taxa Nû ya Midyadê bihata vekirin, ji hêla qeymeqamê navçeyê Hûseyîn Tekîn ve hate astengkirin.
Îdiaya sosret
Hat zanîn ku di nivîsa qeymeqamtiyê ya li ser mohrê de hat îdiakirin ku ‘ji ber sedema ewlekariyê’ destûr nehatiye dayîn ku buro bê vekirin. Têkildarî mijarê rêveberên HDP’ê yên navçeyê axivîn û da zanîn ku dê li Serdozgeriya Komarê ya Midyadê giliyê qeymeqam Tekîn bikin. MÊRDÎN
