Filmê “Di Navberê De” li Salona Sînemayê ya Bezgîn Bekîr Cafeyê, hat pêşandan. Piştî pêşandanê, sînemahezên ku film temaşe kirin, têkildarî mijar û sahneyên filmê gelek pirs ji derhêner û lîstikvanên filmê kirin
Filmê “Di Navberê De” ku di 55’emîn Pêşbirka Neteweyî sala 2018’an de xelata taybet a juriyê wergirtibû, cara yekemîn li Amedê hat pêşandan.
Film bi beşdarbûna derhêner û lîstikvanê film û sînemahezan li Salona Sînemayê ya Bezgîn Bekîr Cafeyê, hat pêşandan. Piştî pêşandana film, derhênerê film Alî Kemal Çinar û listîkvanên film derketin pêşberî temaşevanan û pirsên têkildarî film bersivandin.
Temaşevanan mijara ku di film de cih digirt nirxandin û têkîldarî gelek sahneyên film ji derhêner û lîstikvanan pirs pirsîn. Balkêş bû li gel ku film li ser pirsgirêka zimanê kurdî bû jî hemû beşdarvanan pirsên xwe bi tirkî ji derhêner û lîstikvanan kirin û derhêner û lîstikvanan jî hemû pirsên temaşevanan bi tirkî bersivandin.
Di filmê de çîroka Osmanê ku nikare bi kurdî biaxive û jê fêm dike û bi tirkî diaxive û ji fêm nake tê vegotin. Derhêner Alî Kemal Çinar bi vê çîrokê bal dikişîne ser astengî û pirsgirêka zimanê kurdî ya perwerdeyê û nîşan dide ku ji ber pirsgirêka zimanê xwe kurd her tim di jiyana xwe de zehmetiyan dikişînin.
