Dêrsim de vizêr wareyê Seyîd Rizayî de Newroze bi beşdarbîyayîş xeylî kesan ameye pîrozkerdene. Eşkerayîye de ame vatene ke, înan adirê Newroze seba ameyoxê azadî yê şaran dayo tafînayene
Dêrsim de wareyê Seyîd Rizayî de Newroze ameye pîrozkerdene. Pîrozkerdişî de polîsan dormeyê beşdarbîyayoxan de xeleka hîraye viraşte. Rêxistina HDPyî ya bajarî, Parlamenterê HDPyî Kemal Bulbul, pabesteyê Yewîya Hêzî ya Şorişgêrîye ya Dêrsimî û xeylî hemwelatijî tewrê pîrozkerdişî bîyî.
Bi nameyê Yewîya Hêzî ya Şorişgêre ya Dêrsimî, Hemserekê HDPyî yê bajarî Hidir Çîçekî qisey kerd û ard ziwan ke, ê Newroze bi weçînayîşê cayîyan ê 31ê Adare yo ke seba sîyaseto demokratîk sey referandumî yo pêşwazî kenê û va: “Ma Yewîya Hêzî ya Şorişgêre ya Dêrsimî bi ruhê xoverdayîşî û bi coşê Newroze, weçînayîşê cayîyan ê 31ê Adare de do şorê sindoqe û îradeyê xo rê wayîr bivejîyê.”
Pîrê mi çok nêşana erd ma zî do nêşanê
Dimayê eşkerayîye parlamenterê HDPyî Kemal Bulbulî qisey kerd. Bulbulî operasyonê destbendkerdişî yê nê rojanê peyênan de yenê kerdene û qeyûmî rexne kerdî. Bulbulî ard ziwan ke, Newroze roşanê xoza, Kurdan û Elewîyan a û va: “Newroze seba şaranê Rojakewtene pîroz bo. Elewî Newroze, sey sultane Newroze pîroz kenê û cem danê girê. Kam çi mana da no çi û azadîye de ano têhet, Newroza ci pîroz bo.” Bulbulî Leyla Guven a ke Amed de grevê vêşanîye de silam kerde û va: “Pîrê mi do çok nêşana erd, ma zî nêşanê.”
Qiseykerdişan ra dima adirê Newroze ame tafîyene û deyîran reyde govende ameye girewtene. DÊRSIM
