Komîsyona Mafên Mirova û Hiqûqê ya HDP’ê têkildarî biryara dadgehê ku der barê hevseroka KCD’ê Leyla Guven biryara ‘bi darê zorê anîna danişînê’ dabû, daxuyaniyek da. Di daxuyaniyê de ev biryar weke ‘hewldana cînayetê’ hat nirxandin
Çalakiya greva birçîbûnê ya bêdem û bêdorveger ku hevseroka Kongreya Civaka Demokratîk (KCD) û parlamentera Partiya Demokratîk a Gelan (HD) a Colemêrgê Leyla Guven ji bo rakirina tecrîda girankirî ya li ser Rêberê Gelê Kurd Abdullah Ocalan daye destpêkirin di roja 141’emîn de didome. Rewşa Guven ber bi xetereyê ve diçe û tevî vê yekê jî rayedarên dewletê û wezareta dadê xwe li bedêngiyê dide.
Li şûna ku hikûmet û wezareta dadê bersiv bide daxwazên Guven û bi hezaran çalakgerên di greva birçîbûnê de, duh 5’emîn Dadgeha Cezayê Giran a Amedê biryar da ku Guven bi zorê bibin danişînê. Têkildarî mijarê berdevka Komîsyona Mafên Mirova û Hiqûqê ya HDP’ê Ayşe Acar Başaran daxuyaniyeke nivîskî weşand.
Biryarên provakatîf
Ayşe Acar Başaran di daxuyaniyê de da zanîn ku çalakiya Guven jê re pêşengiyê dike û bi beşdariya bi hezaran çalakvanan didome, hewldanekî ji bo demokrasî, hiqûq û edaletê ye. Başaran destnîşan kir ku li şûna daxwazên Guven û çalakvanan bên bi cih anîn, hikûmet biryarên bêhiqûqî û provoktîf dide.
Hikûmeta AKP’ê hişyar kir
Daxuyaniya Başaran wiha bi dawî bû: “5’emîn Dadgeha Cezayên Giran a Amedê bi vê biryarê re alîgiriya xwe ya bi zaliman û bêhiqûqiyê re ragihandiye. Em ji bo vê biryara dadgehê îktîdara AKP’ê hişyar dikin. Pêkanîna vê biryarê, hewldana cînayetê ye. Daraz, hiqûq û edaleta ku li ser fermana AKP’ê dixebite bi vê helwesta xwe bûye hevkarê komkujiyan.” ENQERE
