Artêşa tirk û çeteyên wê îro jî êrîşî gundên Malîkiye û Merenez ên Şerayê kir. Hat zanîn ku di encama topbaranê de 30 top li gundên navborî ketin
Êrîşên artêşa tirk a dagirker û komên çete yên girêdayî wê yên li dijî gundên Malikiye û Merenez ên navçeya Şera ya Efrînê berdewam in. Hat zanîn ku hêzên dagirker îro di danê sibehê de herêm careke din bi çekên giran bombebaran kir.
Li gorî agahiyên ji çavkaniyên herêmê, artêşa tirk a dagirker û çeteyên wê di danê sibehê de gundên Şerayê bi dijwarî topbaran kirin. Hat ragihandin ku di topbarana li dijî herêmê de herî kêm 30 top li gundên Efrînê ketin. Çavkaniyên ji herêmê destnîşan kir ku topbarana li dijî herêmê berdewam dike.
Hêjayî bibîrxistinê ye ku artêşa tirk û çeteyên wê duh jî gundên navborî û navçeya Arfad (Til Rifet) a Şehbayê topbaran kir. Di encama topbarana artêşa tirk û çeteyên wê yên duh de 5 welatî birîndar bûbûn. EFRÎN
