Komîsyonê Şaran û Bawerîyan ya HDKyî bi wesîleya serrgêra 82. yê Qirkerdişê Dêrsimî eşkerayîyêk da û wina va: “Ganî şarê Dêrsimî ra ozur bêro waştene. Ganî bi hawayo samîmî tarîxî reyde bêrî rî bi rî.”
Komîsyonê Şaran û Bawerîyan ya Kongreya Demokratîke ya Şaran (HDK) bi wesîleya serrgêra 82. yê Qirkerdişê Dêrsimî ke 4ê Gulana 1937î de ameybî kerdene, eşkerayîyêk da û waşt ke selahîyetdarê dewlete raştî reyde bêrî rî bi rî. HDK dîyar kerd ke qerarê qirkerdişî planê çinkerdişêko bi sîstem bî û va: “Tarîxê Tirkîye, tarîxê qirkerdişan Ermenî, Suryanî, Elewî, Kurt, Ezidî, Çerkes û Ruman o. Reyna tarîxê surgun û asîmîlasyonî yo. Qerarê Qirkerdişê Dêrsimî 4ê Gulana 1937î de hetê Heyetê Wezîran ra ame girewtene. Serkêşê şarê Dêrsimî bila sebeb û teberê huqûqî ameyî aliqnayene. Ganî şarê Dêrsimî ra ozur bêro waştene. Ganî bi hawayo samîmî tarîxî reyde bêrî rî bi rî.” ANQARA
