Serdozgeriya Komarê ya Enqereyê der barê parlamentera HDP’ê Dersîm Dag bi hinceta ku ‘tev li merasîma bîranîna endama Dîwana KCD’ê Dîlek Adsan bûye’ fezleke amade kir
Parlamentera Partiya Demokratîk a Gelan (HDP) a Amedê Dersîm Dag ji bo rakirina tecrîda li ser Rêberê Gelê Kurd Abdullah Ocalan 85 rojan di greva birçîbûnê ya bêdem û bêdorveger de bû. Têkildarî Dag di rojên berê de bi boneya grevên birçîbûnê 3 fezlekeyên cuda hatin amadekirin. Hat zanîn ku niha jî bi hinceta ku ‘tev li bîranîna endama Dîwana Kongreya Civaka Demokratîk (KCD) Dîlek Adsan’ ku di 21’ê tebaxa 2018’an de jiyana xwe ji dest dabû bûye, der barê Dag de fezleke hate amadekirin.
Di fezlekeya ku Serdozgeriya Komarê ya Enqereyê amadekirî de hat îdiakirin ku Dag bi tevlêbûna merasîma bîranînê re ‘propgandaya rêxistinê’ kiriye. Di fezlekeyê de wêneyên Dîlek Adsan, posterên Ocalan û pankartên li salonê hatin daliqandin ji aliyê serdozgeriyê ve weke delîla ‘propaganda’yê hate destnîşankirin. Di fezlekeyê de tevlêbûna Dag a kongreya KCD’ê jî weke ‘tespîta sûcên hatine kirin’ hate diyarkirin.
Serdozgeriyê xwest ku ev sûcdariye li gorî xala 83’yemîn a Qanûna Bingehîn bê nirxandin û destnedana parlamenter Dersîm Dag bê rakirin. AMED
