Weçînayîşê Stanbulî de rayanê kurdan ser o zaf munaqeşey benê. Raşta ey qederê nê weçînayîşê rayna zî kurdî tayîn kenê. Stanbul de kurdî, rayanê xo bidê kamî, o qezenc keno. Gelo weçînayîşê 23yê Hezîrane de, kurdî; ko rayanê xo bide kamî? Ez wazena ke no mewzûyê ser o tikê vindra.
AKP û MHP weçînayîşê Stanbulî de, Semedo ke rayanê kurdan bigêrê, propagandaya xo ya yê weçînayîşê 31ê bedilnaya. Hinê behsê beka nêkenê. Bînali Yildirim Semedo ke rayanê kurdan bigêro, yew hetra Amed de, kurdkî qalî keno, yewna hetra behsê kerdan û kurdîstanî keno. No qalkerdiş de, Wezîrê Zîretê yê verî Mehdî Eker zî ey rê çepikan kuweno. Raşta ey kurdkîya ey zî tewşûmewş bî. Tirkîye de 20 mîlyon kurd esto. Şima ne kurdî, ne zî ziwanê kurdan qebul kedo. Şima hetan eyro, henekê xo kurdan û ziwanê kurdan kerdo. E… tabî na zî hem sîrayetê ziwan û hem zî tesîrê têgeyrê şima kerdo. Nê çenday serrî yo ke Bînali Yildirim siyaset keno, berpirsîyarîya/îdarekarîya AKP û Dewleta Tirkîya keno, qet nêbo ganî çend cumleyî kurdkî bizanaynî. Nizdîbîyayîşê kurdkî, nizdîbîyayîşê kurdan o. Eke şima seba rayanê kurdan, nê çend qalan kenê, mekê hina rind beno. Çunku ewta de diriyeya/diriyîya şima vejîna orte. La verî zî semedo ke kurdan rayê xo daybê HDP, şima terorîstîye ra sucdara kerdnê. Serekkomar Tayyîp Erdoganî zî vatbi ke; “Bi namebê kurdîstanî yew herem çin o. Wina yew herem çin o. Kerem ke terkê Tirkîya bike, şo Kurdîstanê Iraqî.”
Dewlet Bahçelî zî semedo ke kurdî rayanê xo bidê, Bînalî Yildirimî, vano ke; “Hemwelatîyê ma yê ke kokê înan kurd o, ganê ma yê, leteyê qesbaya/cîgera ma yê.” Ma kurd î, kokê ma zî kurd o. Sey heme miletan/netewan, yew ziwan û yew nasnameyê zî kurdan esto. Aseno ke no vatiş zî seba rayanê kurdan yeno vatiş û no vatiş de zî qet/tu yew samîmîyet çin o. Xora wekîlê MHP Cemal Engînyûrtî, kurdan yo ke rayê xo dayê HDP, se terorîst lanse keno.
Weçînayîşê 31 Edare de, Ekrem Îmamoglûyî weçînayîşê Stanbulî qezenc kerd. Heyetê Weçînayîşê yê Berzê (YSK), mazbata ey day bere. Dima zî na mazbata ey, ey ra girewte. Ewta de yew maxdûrîyet û bêqanûney esta. Kurdî, na bêedaletey hezm nêkenê. Serekkomar Recep Tayyîp Erdogan, partîya AKP û ortaxê înan MHP; semedo ke rayanê nîjadperestan bigêrê, her weçînayîş ra ver/vîyar gala/hêrişê kurdan kenê. Weçînayîşê 23 Hezîran ra ver zî rayna dest bi operasyonanê leşkerîyan kerdo. Bînalî Yildirimî zî programê televîzyonî de vat ke; “Ma Efrîne û Cerablos girewtê, dima zî ma ko Rojawanê Firatî bigêrê.” Kurdî, no zon de; yew pêameyîş, yew çareserî û roşney/roşnîye nêveynenê. Weçînayîşê 31 Edare de, qorê kurdan bêhemdê xo ray daybê Ekrem Îmamoglûyî. Na ray, hem yew mexdûrîyet esto, hem zî CHP ra teber, uslûb û terzê Îmamoglûyî kurdan motive keno. Nê kurdî, na ray bi hemdê xo, rayanê xo ko bide Ekrem Îmamoglûyî.
31 Edara 2019î de 230 hezar kurdan rayê xo nêdaybê Ekrem Îmamoglûyî. Zafê nê kurdan zî; Weçînayîşê Stanbulî de, ko rayanê xo bidê Ekrem Îmamoglûyî. Çunku hinê aseno ke nê kurdan zî fehmkerdo/famkerdo ke temsîlkarê AKP, seba menfeetê xo yo sîyasî û ekonomîyî, dînê îslamî xo rê kenê alet. Yewna het ra nê temsîlkarê vanê ke; “ma birayê yewnan/yewbînan î”, la pratikte polîtîkaya nîjadperestîye pratîze kenê. Nê kurdî; hinê zanê ke mîrazê/amînê na partî de; heq, huqûq û sewyewbînananîye çin a. Heme sazî û dezgeyê na dewlete; tirkîtîye ser o awan bîyê. Na partî zî bi no ferasetî awan bîya. AKP, semedo ke nê kurdan îqna bikero/biko, welat ra mellayî, serekê bajaran û qezayanê yê AKP, berdê Stanbul. Aseno ke semedo ke rayanê kurdan bigêrê çi destê înan ra yeno kenê.
Grevê veyşaney dima Ocalanî ser ra tecrît hewana. Weçînayîş ra ver/vîyar, wekîlê HDP Ferhat Encu verrada. Nê gamî helbet baş î. La kurdî seba nê gaman, rayanê xo nêdanê yewerî. Çimê kurdan de, tecrît xeyrê qanûnî bi. Goreyê kurdan, ne Ferhat Encûyî ne Selahattîn Demîrtaşî, ne zî wekîlanê binan, yew suc kerdo. Goreyê kurdan, zerre de tewiştişê/tepîştişê înan, yew bêedaletey a.
Weçînayîşê 31ê Edare 2019î dima, Şaredarîya Rezanê Amed, qezayanê Edremîtî, Tûşbayî, Çaldiranî û Beypinarê Qezayê Dîgor de; mazbata ke namzetanê hemserekanê Şaredaranê HDPyan bi rayanê şarî heq kerda, girewta daya namzetanê AKPyan. Kurdî na bêedaletey zî xo vîrnêkenê.
Goreyê mi, kurdî; hinê bi mellayan zî îqna nêbenê. Kurdan îqtîdarê AKP ceribnayo. Nê 17 serrî yo ke AKP îqtîdar de ya. Tirkîye de ne vayey rê yew çare dîyo, ne bêkarey rê yew çare dîyo, ne zî meseleya kurdan çareser kerda. Eke Tirkîye de heq, huqûq û demokrasî bibîynî, heme meseley asan hal bîynê. Çi heyf ke Tirkîye de heq huqûq û demokrasî çin o. Îqtîdarê AKP polîkaya aşîtî nê yê şerî esas gêno. Yanî AKP kurdan rê yewna rayîr nêverdayo. No semed ra, Stanbul de, Weçînayîşê 23yê Hezîran de, kurdî; rayanê xo ko bide Ekrem Îmamoglûyî.
