Dewleta Tirkîya û tayê hetkarê ya, goya semedo ke Cerablosî DAIŞî ra bigîrê; 24ê Tebaxa 2016î de bi çekanê giranan, dest bi “Operasyonê Firat Kalkanî” kerd. Cerablûs, El Raî, Ezaz, Elbab girewt binê destê xo. Derdê înan ewta de DAIŞ nêbi. DAIŞ xo rê kerd bahane. 7ê Teşrîna Verîne 2017 de, dekewtê vakûrê Îdlîb û nizdîyê sîndorê Efrîne de bica bîy. Tirkîye, Îdlîb de mûxalîfan ra yew ordû awan kerd. Ewta de asil hedef, kurdî Rojawanî bî.
Ordûyê Tirkîye û bi OSOyî 20ê Çeleyê 2018î bi namebê “Zeytîn Dali Harekati” hêrişê Efrîne kerd. Dewleta Tirkîye, 19 Edare 2018 de destna Efrîne ser. Nika zî semedo ke bidekewê Rojawanê Firatî; bi des hezaran leşkeran û bi seyan tanq û topan, sîdorê Rojawanî teyakûz de vindete yê.
Tirkîye de laj û keyneyê xizanan mirenê, keye û warê înan xeripêno. Peynîya nê şeran de, fabrikatorê çekan û tayê çimakerdeyî dewlemend benê. Merdimî ke şer de israr kenê, lajê înan leşkeri nêkenê. Lajanê înan yan raporo çurug girewto, yan zî leşkerîya xo bi peran kerda. La şer de û şer ra pey îqtîdarê xo bi hêz kenê. Nê merdimî, siyaseten şer ra miqat benê. Xora eke yew sîstemo demokratîk bibo, deşifre benê û sîaseten qedînê.
Gelo Dewleta Tirkîya, çirê hêrişê Rojavanaî kena? Merdimî ke no sîstem ra miqat benê, semedo ke îqtîdar de bimanê; hem zerreyê Tirkîye de, hem zî teberê Tirkîye de heme wext xo rê dişmenan peyda kenê. Bê polîtîkaya şer û nîjadperestey, yewna çîy înan dest de nîmendo. Yanî yew çîyo ke înan pay ra vindro çin o. Yewna hîkayeyê înan yo newe nêmendo. Ancax bi politikaya şer û nîjadperestîye heme kemanîyanê xo bincil kenê. Aye ra wazenê ke hêrişê kurdanê Rojavanî bikê/bikerê. Goreyê înan; ‘Eke Rojawan de, kurdî wayîrê yew statuyê bibê, tesîr û hêzê înan ra kurdî Vakûrî zî sebaroj ko doza statuyî bikê.’Eke kurdî, wayîrê yew statuyî bibê û Tirkîye de yew sîstemo/pergalo demokratik awan bibo, riyê îna yo sîya zî vejîno meydan. Îqtîdarê AKP, wazeno ke, Rojhilatê Rojawanî, bigêro binê kontrolê xo. Goreyê ma, no zîhnîyet û no têgeyr; bi temam qaos, gonî billakerdiş ra vêşêr yewna çîy nêano.
Amerîka, sindorê Rojavanê Rojeva de, bi xorîneya 15 km, yew heremê Tamponî pêşnîyaz kerdo. Dewleta Tirkîya, bi xorîneya 32 km yew heremê Tamponî wazena. YPG zî sîndor de bi xorîneya 5 km yew heremê Tamponî wazena. Yewna het ra YPG zî nêwazena ke Dewleta Tirkîya heremê tamponî de ca bigêro. Serekkomar Erdoganî vat ke, “Ma nika dekewenê Rojhilatê Firatî, no semed ra ma xebere daya Amerîka û Rûsya. Aseno ke Amerîka nêwazena ke Tirkîye bikewo Rojawan. Wezîrê Pawitoxê yê Amerîka Mark Esperî vat ke; “ Dekewtişê Tirkîye nîyno qebulkerdiş.”
Bi nê şerî, yew het ra wazenê ke, manîyê parçebîyayîşê AKP bibê. Yewna het ra bi politikaya şerî, vengê mûxalefetî bibirnê. Dewleta Amerîka, nêwazena ke Tirkîye bikewo Rojawan. Eke Tirkîye bikewo Rojawan, DAIŞ newe ra ganî beno. Xora cêko Tirkîye vato ke ma dekewenê Rojawan, DAIŞî newe ra dest bi çalakîyan kerdo.
Tewr peynî de, Amerîka semedo ke Tirkîye nêdekewo Rojawan, Tirkîye reyde dest bi dîplomasî kerdo. Aseno ke peynîya nê pêveynayîşan de gaza Tirkîya tikê girîyaya. Kurdanê Sûrîye, hetan eyro Dewleta Tirkîye tehdît nêkerda. Dinya zî zana ke Kurdê Rojawanî, Tirkîye tehdit nêkenê. Propagandaya tehdîtî, bi temam yew zura boçin a. Dewleta Tirkîya bi ferasetê emperyalî têgeyrena.
No cografya, hinê billakerdişê gonî ra mird bîya. Şer de israr, yew gureye aqilî nîyo. No çi tewir yew kîn o? Hinê bes o, fek hêrişkerdişê kurdan verradê.
Nuşteyê Binê: Mi nuşteyê xo de, yew nuşteyê xo yo veren ra îstîfade kerdo.
