Li gundên çiyayî yên Pasûrê amadekariyên zivistanê dest pê kirin. Gundî ji bo zivistana dijwar dims, şûşe, toraq hwd. amade dikin
Li Kurdistanê zivistan herî zêde li gundên çiyayê dijwartir derbas dibe. Yek ji van gundan gundê Akçesêre ya girêdayî mezraya Kipovît a navçeya Pasûra Amedê ye. Ji ber vê li gundên çiyayî yên navçeyê ji niha ve amadekariyên ji bo zivistanê dest pê kirine. Gundî ji bo zivistanê, rîçala hejîran û qatixên amade kirine dixin bin erdê. Her wiha zebze û fêkiyan jî hiltînin.
Têkildarî amadekariyê jina bi navê Fehîme Bozkûrt diyar kir ku zivistana gundê wan zivistaneke hişk e loma ji havînê ve amadekariyên zivistanê dikin û got ku ji bo zivistanê ew rîçala hejîran çê dike.
Bozkûrt anî ziman ku ew ji bacanên sor ên organîk salçeyê jî çê dike û wiha got: “Piştî em bacanên sor dieciqînin, em wan 3 çar rojan wisa dihêlin. Paşê em li sizgêcê dixin û dixin kîsan. Du rojan jî di kîs de dimînin û bi vî awayî ava wan dadiwerive. Piştî ava dadiwerive em du rojên din jî li ber tavê dihêlin. Paşê em xwê dikin û dixin şûşeyan. Her wiha dervejî çêkirina ava bacanên sor dimsê jî çê dike.”
Di heman mijarê de Cahîde Yildiz jî da zanîn ku ew bi şîrê heywanên xwe mast, rûn û toraqê çê dikin û ev tişt anî ziman: “Em toraqa xwe xwê dikin û dixin meteryan. Ji bo zivistanê jî em dixin bin erdê. Em ji mezinên xwe hîn bûne. Niha em jî heman tiştî dikin. Bi qasî 6 mehan di bin erdê de dimîne.”
Her wiha Yildiz destnîşan kir ku divê cihê qatixê ku hiltînin hênik be û axaftina xwe wiha bi dawî kir: “Gava cihê wan hênik be hem tahma wan xweş dibe hem jî xirab nabin. Her wiha li gorî axê tahma wan jî diguhere. Mesela ger cihê wan ne hênik be tahma wan nexweş e. Em penêr, rûn, toraq û tûyan dixin bin erdê.” AMED
