Nameya ku parlamenterê HDP’ê Necdet Îpekyuz ji bo girtiyên di greva birçîbûnê de re şandibû, weke sedema ‘Moral û motîvasyonê bilind dike’ hate nirxandin û der barê Îpekyuz de bi îdiayên ‘Propaganda’ û ‘Pesindayîna sûc û sûcdar’ fezleke hate amadekirin
Parlamenterê Partiya Demokratîk a Gelan (HDP) ê Êlihê Necdet Îpekyuz di 8’ê sibatê de ji 3 girtiyên ku li Girtîgeha Jimar 2 ya Tîpa T ya Îzmîrê ji bo rakirina tecrîda li ser Rêberê Gelê Kurd Abdullah Ocalan di greva birçîbûnê ya bêdem û bêdorveger de bûn re name şand. Nameya Îpekyuz weke ‘Moral û motîvasyona girtiyan bilind dike’ hate nirxandin û der barê Îpekyuz de bi îdiayên ‘Propaganda kiriye’ û ‘Pesindayîna sûc û sûcdar kiriye’, bi daxwaza destnedayînê fezleke hate amadekirin.
Îpekyuz di nameya xwe de wiha gotibû: “Di vê serdema zilmê de ji ber berxwedana we ya ji bo rûmeta mirovahiyê ez we yek bi yek silav dikim. Divê hûn bizanin ku ji bo mezinkirina berxwedana we û pêkanîna daxwazên we yên herî xwezayî yên ji bo jiyaneke mirovane, çi ji destê min tê ez ê bikim. Di nava van hestan de ez yek bi yek ji we tevan re silav û hezkirinên xwe dişînim.” ENQERE
