Hêzên dagirker ên dewleta tirk navenda Qamişlo û gundê Hikmiye yê Dêrikê ku gelemperiya şêniyên wê suryanin topbaran dike. Li Girê Spî şervanan çalakiyên bi bandor pêk anîn û di çalakiyan de 2 tank û panzêrek hatin rûxandin
Êrîşên qirkirinê yên dewleta tirk a dagirker ên li dijî rojavayê Kurdistanê bi hemû dijwariya xwe didomin. Dewleta tirk a ku hemû pîvanên şer binpê dike û sûcên şer dike, niha careke din gelek deverên sivîlan topbaran kirin. Li hemberî van êrîşên qirkirinê, şervanên Hêzên Sûriyeya Demokratîk (HSD) jî di çarçoveya Berxwedana Rûmetê de bersivên tund didin.
Li gorî agahiyan, hêzên artêşa tirk a dagirker û komên çete yên wê di van kêliyan de taxên Meyselûn û Qenat Siwêş ên bajarê Qamişloyê ku bi hezaran sivîl tê de ne topbaran dikin. Têkildarî encamên êrîşê heta niha agahiyên zelal nehatine bidestxistin.
Gundê suryanan tê topbarankirin
Di heman demê de hêzên dagirker gundê Hikmiye yê Dêrikê ku gelemperiya şêniyên wê suryanin, bi dijwarî topbaran dike. Hat zanîn ku di encama topbarana artêşa tirk de topeke hewanê li Navenda Meclisa Leşkerî ya Suryanan ket. Topbarana li ser gund hê jî didome.
2 tank û panzêrek hatin rûxandin
Li hemberî êrîşên qirkirinê yên dewleta tirk û komên çeteyên wê, şervanên HSD’ê jî li bakurê navçeya Eyn Îsayê çalakiyên bi bandor pêk anîn. Li gorî agahiyan, di encama bersivdayîna şervanan de 2 tank û panzêreke dagirkeran hatin teqandin. Têkildarî kuştî û birîndarên dagirkeran agahiyên zelal nehatin bidestxistin.
