HSDyî cewab da vengdayîşê Wezaretê Pawitişî yê Sûrîye ke hêzê HSDyî tewrê artêşa Sûrîye bibê, şertê peymanêka sîyasîye ya waştişê şarî bêrê ca û mabênê artêşê de xoser bibo pêşkêş kerd
Wezaretê Pawitişî yê Sûrîye beyanatêk da û Hêzê Sûrîyeya Demokratîke (HSD) ra waşt ke seba xoverdayîşê verba hêrişanê dagirkeranê Tirkîya tewrê artêşa Sûrîye bibê.
Fermandarîya Pêroyî ya HSDyî wina cewab da: “Sey Fermandarîya Pêroyî ya Hêzê Sûrîyeya Demokratîke (HSD) ma paşt danê pêroyê xebatanê pawitişê yewîya Sûrîye û şikitişê hêrişanê Tirkîya yê ke welat û şarê ma ser ê. Tewirê ma destpêkî ra nata kifş o. Ganî mekanîzmayêko rast newe ra bêro sazkerdene û çarçeweya yewkerdişê kedan de bêro dîyene. Ganî yewîya hetî bingeyê çareserîye bibe.
HSD verê çimanê dinya de serranê peyênan de seba pawitişê Sûrîye û cîhanî verba DAIŞî şer kerd, xilafeta ey Sûrîye û cîhan de rijnaye. HSD leşker ê û goreyê sîstemêkî rêxistine bîyî. Ma ziwanê mûxatebgirewtişê Wezaretê Pawitişî yê Sûrîye nê endaman bi hewayêkê pêtî red kenî. Herinda ke wezaretî nê endamî mûxateb girewtî, ganî fermandarîya pêroyî ya HSDyî seba akerdişê berê dîyalogan mûxateb bigirewtêne.”
