Li navçeya Sûrê ku qedexe, rûxandin û înşeat didomin, kevirên malên dîrokî bi qamyonan tên kişandin û firotin
Li ser qedexeya derketina derve ya li 6 taxên navçeya Sûr a Amedê 4 sal derbas bûn. Piştî pevçûnên li navçeya dîrokî gelek avahiyên dîrokî hatibûn rûxandin. Li gorî rapora TMMOB’ê ya derbarê Sûrê de li taxa Cevatpaşa, Hasirli, Dabanoglû, Savaş, Cemal Yilmaz û Fatîh Paşa 87 avahiyên tescîlkirî di nav de bi giştî 4 hezar û 985 avahiyên dîrokî hatine rûxandin û di raporê de ev rewş wekî ‘qirkirina çandî’ hat pênasekirin.
Li Sûrê ku 4 sal in bênavber qedexe didome û xwediyên avahiyan jî nikarin têkevinê, di bin kontrola polîsan de bi qamyonan kevir hatin kişandin û li hêla Deriyê Mêrdînê li qeraxa Çemê Dîcleyê hatin valakirin. Tê gotin qamyona van keviran bi 8 hezar TL’yî tê firotin. Her wiha qamyona kevirên bijartî jî bi 15 hezar TL’yî tê firotin. AMED
