Meclisa Jinan a HDP’ê peyama 2020’an weşand û diyar kir ku wekî sala 2019’an dê di sala 2020’an de jî li dijî pergala qeyûm ku dixwazin li welat ava bikin têkoşîna xwe berdewam bikin
Meclisa Jinan a Partiya Demokratîk a Gelan (HDP), ji bo sala 2020’an peyamek weşand. Meclisa Jinan a HDP’ê anîn ziman ku dê di sala 2020’an de li dijî polîtîkayên ku dijminantiya jinê dikin serî netewînin û bi rêngê jinê tekoşîna xwe bêtir mezin û bilind bikin û wiha gotin: “Me jinan, li dijî polîtikayên ku dijminantiya jinê dike serî netewand û em serî natewînin. Wekî sala 2019’an, em dê di sala 2020’an de jî li dijî rejîma qeyûm ku dixwazin li welat ava bikin têkoşîna xwe berdewam bikin. Bloka faşîst a AKP-MHP’ê, li dijî jinên ku li Kurdistan û Tirkiyeyê di nava siyasetê de cih digirin, li dijî tevgerên femînîst û jinên muxalîf ên jinan, êrîşên xwe berdewam dike. Dixwazin têkoşîna jinê krîmînalîze bike û rêxistinbûna jinê lawaz bike. Li aliyekî qeyûm tayînî şaredariyan kir, li aliyê din pergala hevserokatiyê û saziyên jinan krîmînalîze dike. Bi daraz û medyaya xwe vê yekê reş dike. Bloka faşîst a AKP-MHP’ê li dijî tevgera jinan, meclisa jinê ya HDP û TJA’yê êrîşên xwe didomînin. Dixwazin jinan li dervê jiyanê û siyasetê bihêlin û jinê bê vîn bihêlin. Bi îdîanameyên vala xebatên TJA û rêveberiyên herêmî wekî ‘sûc’ nîşan dan. Hemû xebatên jinan sûc dibînin.
Em wekî Meclisa Jinan a HDP’ê, serî li hemberî van polîtîkayan netewand û ji niha û şûnde jî em serî li hemberî wan natewînin. Wekî sala 2019’an em ê di sala 2020’an de jî li dijî rejima qeyûm têkoşîna xwe berdewam bikin.
Hevserokatî xeta me ya mor e. Xebatên jinê nayên krîmînalîzekirin. Bijî Piştevaniya Jinan.” ENQERE
