Amed de partîyanê sîyasîyan û têgêrayîşanê kurdan êyê ke Xebatê Îtîfaqê Kurdîstanî de ca gênê da pêhesnayene ke Newroze rîyê Vîrusê Korona ra ameya îptalkerdene.
Kongreya Komela Demokratîke (KCD), Tevgerê Cinîyanê Azadan (TJA), Partîya Herêmê Demokratîkî (DBP), Partîya Demokratîke ya Şaran (HDP), Partîya Azadîye, Komeleya Şorişgêranê Demokratîkan ya Kurdan (DDKD), Partîya Merdimî û Azadîye (PÎA), Partîya Komunîste ya Kurdan (KKP), Platformê Demokratanê Kurdîstanî yê Vakurî (PDK-Vakur) derheqê Newroze de banê KCDyî de kombîyayîşê çapemeyî kerd.
Hemserekê KCDyî Leyla Guven û Berdan Ozturk, hemserekê DBPyî Salîha Aydenîz û Keskîn Bayindir, vervatoxa TJA Ayşe Gokkan û temsîlkarê partîyanê kurdanê ke Xebatê Îtîfaqê Kurdîstanî de yê tewrê ci bîyî.
Eşkerayîye de dîya eşnawitene ke mîtîngê Newroze rîyê Vîrusê Korona (Kovid-19) ra ameyî îptalkerdene. Eşkerayîye de wina ame vatene : ”Ma semedê şayîyanê biheybetan ê Roşanê Newroze xo amede kerd, la çi heyf o ke rîyê Vîrusê Korona yo ke her roje vila beno ma qerarêko newe girewt. Xora yeno zanayene ke şayîyê Roşanê Newroze sey mîyanneteweyî yenê kerdene, her hetî ra tewirbîyayîşî benê. No zî hetê Vîrusê Korona ra rîsk o. Vera tehlukeyê Korona sey tedbîrî ma aktîvîteyanê kitlekî yê Newroze îptal kenê û wazenê ke naye şarê xo û komelê rayapêroyî rê bidê eşnawitene. Ma wazenê naye zî vajê ke no semedê ma zî qerarêko rehet nêbi la hetê sîyasî û ehlaqî ra ma semedê weşîye mecbur mendî ke nê qerarî bigêrê. Na çarçewe de ma kesê ke Korona ver merdî rê hûmayî ra rehmet û nêweşan rê şîfa wazenê.” AMED
