2ê temmuza 1993î hunermend û roşnvîrî seba ke tewrê Şayîya Pîr Sultan Abdalî bibê şîbî Sêwas. Nê kesê ke zafê înan elewî bî Otêla Medimakî de ameyî tafînayene. 33 roşnvîrî û 2 xebatkarê otelî pêro pîya 35 kesan otêle de dinyaya xo bedilnaye.
Qirkerdişo ke ser ra 27 serrî ravêrtî bi wesîleya serrgêra ci yeno şermezarkerdene û qûrbanî yenê yadkerdene. Rayberîya Înîsîyatîfê Hunermendanê Dêrsimî de Jîyargehê Gola Çetu ke semedê Dêrsimijan cayo bimbarek o de aktîvîteya vîrardişî ameye kerdene.
Hunermend û hemwelatijê waro bimbarek de ameyî pêser, semedê kesanê ke qirkerdiş de cuya xo vînî kerde mûmî tafînayî û nîyazî vila kerdî. Bado ke derheqê muhîmîya roje de ame qiseykerdene hunermendî Metîn Kahraman û Yilmaz Çelîkî ard ziwan ke înan qûrbanê qirkerdişî xo vîrî ra nêkerdî û bi deyîran ê yad kerdî. Dima ra semedê 33 roşnvîran gulî ameye eştene Royê Munzurî. DÊRSIM
