Meclisa Ciwanan a HDP’ê, di çarçoveya ‘Bernameya Têkoşîna Demokratîk’ a partiyê de kampanyaya ‘Tev bi hev re bikeve tevgerê’ dide destpêkirin. Sibê li Parqa Maçka ya navçeya Şîşlî ya Stenbolê, bi beşdariya hevserokên giştî yên partiyê Pervîn Bûldan û Mîthat Sancar starta kampanyayê bê dayîn û heta 1’ê îlonê berdewam bike.
Meclisa Ciwanan bi kampanyayê heta 1’ê Îlonê bi rojeva tacîz û tecawiz, talana ekolojiyê, bêkarî, pergala perwerdeyê û tecrîdê gelek çalakî û hevdîtinan pêk bîne.
Dê ciwan bên gel hev
Piştî startê heta 26’ê tîrmehê li gelek bajaran bi ciwanan re hevdîtin bên kirin, pirsgirêkên wan bên guhdarkirin û derbarê çareseriya pirsgirêkên wan de xebat bên meşandin. Di navbera 26 û 10’ê tebaxê de jî di çarçoveya kampanyayê de seryran, geşt û tûrên bisqiletê bên lidarxistin.
Dê meclis, di navbera 10-30’ê tebaxê de jî xebatên atolyeyê bên sazkirin. Di vê çarçoveyê de wê ruhê ciwanan, îstîsmara zarokan, tacîz û tecawiz, pergala alternatîf a perwerdeyê û pirsgirêkên kedkaran bên nîqaşkirin.
Di çarçoveya kampanyayê de dê derbarê tecrîda li ser Rêberê Gelê Kurd Abdullah Ocalan û zextên ku li girtîgehan li ser girtiyan zêde bûne jî xebat bên kirin û ciwan li dijî tecrîdê plana têkoşînê çêbikin.
Her wiha di çarçoveya kampanyayê de Meclisa Ciwanan dest bi xebatên xwe yên akademiya siyasetê jî dike.
Meşa 1’ê Îlonê
Meclisa Ciwanan, dê bi hemû rêxistinên ciwanan re li Amed û Stenbolê bi meşen dirêj tev li mitîngên 1’ê Îlonê bibe.
Hevberdevka Meclisa Ciwanan Sevîm Akdag derbarê kampanyaya ku bidin destpêkirin de axivî û diyar kir ku êdî li şûna daxwazê wê jî înşa bikin û bang li hemû ciwan kir ku li qad û kuçeyê gotina xwe bibêjin. AMED
