YSK 7 qezayanê Amedî de bi mehneya ‘asayîşî’ bedilna û 14 sindoqan zî kerd yew
Heyetê Weçînayîşî yê Berzî (YSK) seba weçînayîşê 31ê Adare, 5ê Adare de 7 qezayanê Amedî de cayê tay sindoqan bedilna û tay zî kerd yew. Badê ke Walîtîya Amedî 22ê Sibate de muracatê YSKyî daye û va ‘problemê asayîşî esto’ YSK no qerar da.
YSK qezaya Pasûrî de cayê 35 sindoqan ke hûmara weçînitoxan 7 hezar û 578 kesî bî, qezaya Pîranî de cayê 7 sindoqê ke hûmara weçîntoxan hezar û 48 kesî bî, qezaya Hênê de cayê sindoqêk ke hûmara weçînitoxê ci 231 kesî bî, qezaya Hezro de cayê 10 sindoqê ke hûmara weçînitoxan hezar û 953 bî, qezaya Licê de cayê 5 sindoqê ke hûmara weçînitoxan hezar û 145 kesî bî, qezaya Farqînî de cayê 7 sindoqan ke hûmara weçînitoxan hezar û 308 kesî bî û qezaya Bismilî de cayê 5 sindoqan ke hûmara weçinitoxan 224 kesî bî bedilna. Sewbîna qezaya Licê de 14 sindoqê ke hûmara weçînitoxan 2 hezarû 398 kesî bî zî kerd yew.
Heyetê Weçînayîşî yê Berzî (YSK) qezaya Pîranî ya Amedî de 8ê Sibate de bi mehneya ‘asayîşî’ qerar dabî ke 13 sindoqê taxanê cîya-cîyayan bibî yew. HDP îtirazê qerarî kerdbî û qerar ameybî betalkerdene. Badê Pîranî na reye 7 qezayanê Amedî de no qerar ame girewtene. HDP reyna îtirazê YSKyî kerdbî, la YSK e îtiraz red kerd. AMED
