Endama OHDyî Avûkate Aryene Turan Heyetê Pêroyî yê Baroyê Îzmîrî de 22ê teşrîna verêne de nameyê OHDyî ser o qisey kerdbi û qiseykerdişê xo de waştbi ke hêrişê kîmyewîy wa bêrê cigêrayene, tepişteyê nêweşî bêrê veradayene. Aryene qiseykerdişê xo bi sloganê ‘jin, jiyan, azadî’ qedînabî.
Serdozgerîya Komare ya Îzmîrî derheqê Turane de 24ê teşrîna verêne de tehqîqatêk dabi destpêkerdene. Avûkate Aryen Turan vizêr amebî destbendkerdene û kontrolê weşîye ra dima ameye berdene bi Mudirîya Polîsan a Îzmîrî.
Ame zanayene ke Turane badê îfadedayîşî hetê mehkemaya ke vejîya ra bi şertê kontrolê edlî û qedexeyê tebervejîyayîşî yê teberê welatî serbest ameye veradayene. ÎZMÎR
