Navenda Nûçeyan |
Li Fransayê amadekarî ji bo hilbijartinên şaredariyê yên 15 û 22’yê adarê tê kirin. Tûra destpêkê ya hilbijartinên şaredariyê dê 15’ê adarê pêk were û şaredar û endamên meclisa şaredariyê yên nêzî 35 hezar bajar û bajarokan bên diyarkirin. Bala raya giştî ya Fransayê bi giranî li ser Parîs û bajarên mezin e. Lê belê namzetên komunîst kêm tên nîqaşkirin.
Di hilbijartinên 2014’an de di nava 40 bajarên ku nifûsa xwe di ser 100 hezar kesî re ne tenê li Saînt-Denîsê û ji 270 bajarên ku nifûsa xwe di ser 30 hezar kesî re ne tenê li 22 bajaran Partiya Komunîst a Fransayê (PCF) û Eniya Çep (FG) bi ser ketibûn.
Partiya Komunîst a Fransayê (PCF), Fransa ya Serî Natewîn (FI) û gelek partiyên çep bi biryar in ku di hilbijartinên vê carê de hem şaredariyên di destê xwe de biparêzin hem jî yên nû qezenç bikin.
Di nava şaredariyên ku ji aliyê endamên PCF ve tên birêvebirin de ya herî zêde balê dikişîne bajarê Morsang-sur Orge ye ku ji sala 1953’yan ve tenê ji aliyê jinan ve tê birêvebirin. Bajarê ser bi herêma Esssonneyê, di navbera salên 1953-1965’an de ji aliyê Marîe Geoffroy ve, di navbera salên 1965-1996’an de ji aliyê Genevîeve Rodrîgûez û ji sala 1996’an û vir ve jî ji aliyê Marjolaîne Raûze ve tê birêvebirin. Di hilbijartinên vê carê de jî namzeta PCF Marîe-Claîre Arasa xwe amade dike ku ala rêveberiyê ji destê Raûze werbigire.
Rêveberiya demokratîk a tevlikar xistin meriyetê
Marîe Claîre Arasa diyar kir ku namzetên komunîst bi taybetî bi ‘nêzîkatiyên însanî’ xwe nêzî gel dikin.
Marjolaîne Raûze ku ji sala 1996’an ve bajêr bi rê ve dibe, ji rojnameya Lîberatîon re axivî û anî ziman ku ew şaredarên jin hewl didin bi nêzîkatiyeke cuda têkiliyê bi şêniyên bajê re deynin û destnîşan kir ku ew bi xwe bi dirûşma ‘parvekirina hêzê bi gel re’ tevgeriya ye.
Morsang-sur-Orge bi ‘Komîteyên welatiyan’ ku di sala 1998’an ketin meriyetê, pêşî li tevlibûna gel a li rêveberiyê hate vekirin. Ev yek jî bi sûdwergirtina ji modela demokrasiya tevlikar a li bajarê Porto Alegre ya li Brezîlyayê hate pêkanîn. Di vê çarçoveyê de li bin sîwana ‘Atolyeyên welatiyan’ mirov projeyên girîng ên bajêr nîqaş dikin û di çarçoveya daxwaza wan de proje tên amadekirin.
