Tevî hemû astengiyan jî bi dehhezaran welatî li Stenbolê di herikin qada Newrozê. Li qada Newrozê welatî dirûşmên ‘Bijî Serok Apo’ û ‘Bijî berxwedana zindanan’ berz dikin
Bi tevlêbûna dehhezaran welatiyan û gelek partiyên siyasî, li Qada Pazar a Bakirkoy a Stenbolê şahiya pîrozbahiyê tê lidarxistin. Newroza îsal bi dirûşma ‘Teqez em ê bi ser bikevin û tecridê bişikînin’ tê pîrozkirin. Di saetên serê sibê de gelê Stenbolê bi cilên xwe yên herêmî û neteweyî daketin kolanan û berê xwe dan qada Newrozê. Bi dehhezaran welatî piştî lêgerînên li noqteyên polîsan, daketin qadê.
Komên ku piştî lêgerîna polîsan derbasî qadê bûn nîşaneyên serkeftinê bilind kirin û dirûşmên ‘Teqez em ê bi ser bikevin, tecrîdê bişikînin’ berz kirin. Welatiyên ku rêya Încîrlî ya metrobus û metroyê bi kar anîn, bi dirûşmên ‘Jin jiyan azadî’, ‘Bijî berxwadana zindanan’ û ‘Leyla Guven rûmeta me ye’ daketin qadê.
Ciwanek hat binçavkirin
Polîsen ku li 3 noqteyan lêgerînê dikin, destûr nadin ku welatî pankart, dowîz û amûrên cuda derbasî qadê bikin. Ciwanekî ku tîşortê Zulkuf Gezen ê ji bo bidawîkirina tecrîd li ser Rêberê Gelê Kurd Abdullah Ocalan çalakiya fedaî pêk anî û jiyana xwe ji dest da, li xwe kiribû xwest têkeve qadê. Lê polîsan bi hinceta tîşortê wêneyê Zulkuf Gezen û nivîsa ‘Em ê tecrîdê bişikînin Zulkuf Gezen’ li ser e, ciwan binçav kir.
Qad bi dirûşma ‘Bijî Serok Apo’ olan da
Lê tevî hemû astengiyan jî ji 7 salî heta 70’ê salî bi dehhezaran kes derbasî qadê bûn û bi cilên xwe yên kesk, sor, zer, spî û rengên cuda qad xemilandin. Ji niha de bi hezaran li dora def û zirneyan govend gerandine û Newrozê pîroz dikin. Welatiyên ku ala HDP’ê li ba dikin qad geş kirin. Li ser dika Newrozê jî pankarta mezin a ‘Newroz pîroz be’ hat daliqandin. Qad bi dirûşmên ‘Bijî Serok Apo’ olan dide.
Bernameya Newrozê bi rêzgirtinê dest pê kir. STENBOL
