Berpirsê Tîma Gerok a Pêngava Boykotkirina Male Tirkî ya li Hewlêrê Rêbaz Faruq got ku wan di çarçoveya xebata xwe de li Hewlêrê 18 hezar belavok belav kirine. Faruq da zanîn ku bi destpêkirina boykotê re firotina berhemên şîrketa Altun ji sedî 40 kêm bûne
Gelê başûrê Kurdistanê li dijî êrîşên dagirkeriyê yên dewleta tirk a dagirker ên li dijî rojavayê Kurdistanê, dest bi kampanyaya boykotkirina malên tirkî kiribû. Kampanya her ku diçe berfirehtir dibe. Têkildarî mijarê Berpirsê Tîma Gerok a Pêngava Boykotkirina Malên Tirkî ya li Hewlêrê Rêbaz Faruq ji Rojnewsê re axivî.
Rêbaz Faruq anî ziman ku ji destpêka pêngavê ve wan têkildarî boykotê 18 hezar belavok li Hewlêrê belav kirine û xebata wan ji hêla gel ve jî bi dilgermî hatiye pêşwazîkirin. Faruq got ku gelek dermanxane hene ku dibêjin êdî dermanên tirkan bi kar nayînin.
Rêzefîlmên tirkî
Herî dawî jî Faruq ev agahî dan: “Ji ber bandora boykotê, firotina berhemên şîrketa Altun ji sedî 40 kêm bûne. Dê pêngav bidome û dê rengîntir bibe. Plansaziyên me yên çalakiyan hene. Bi taybet jî li dijî rêzefilmên ku destê xwe xistina nava jiyan û malbatan me de. Her wiha em ê li gel hunermendan zextan li ser Wezareta Rewşenbîriyê bikin da ku rêzefîlmên tirkî bi temamî rawestînin.” HEWLÊR
