Çalakiya greva birçîbûnê ya bêdem û dorveger ku girtiyan PKK û PAJK’ê di 27’ê Mijdarê de bi armanca rakirina tecrîda li ser Rêberê Gelê Kurd Abdullah Ocalan dabûn destpêkirin, di roja 20’emîn de didome. Girtî û malbatên wan ji bo piştgiriya çalakiyê bang dikin û dê sibê greva ji aliyê koma 5’emîn ve bê dewrgirtin.
Husnu Aşkan (32) ku li Girtîgeha Tîpa F a Tokatê girtî ye û di koma 4’emîn de çalakiya greva birçîbûnê didomîne, bi rêya telefonê bi malbata xwe re hevdîtin kir. Aşkan, ji malbata xwe re ragihand ku wê di 17’ê kanûnê de grevê dewrê koma 5’emîn bikin û destnîşan kir ku li girtîgehê girtiyên ku bi virûsa koronayê ketine hene û ev girtî û girtiyên nexweş sewqî nexweşxaneyan nayên kirin. AMED
