Gerîlayê HPGyî Zindan Yenî êlula 2021î de dewa Pirêjmanî ya qezaya Pîranî ya Amedî de şer de şehîd bibi. Şehadetê gerîlayî ser o keyeyê ci muracatê dozgerîye kerd la dozgerîye bi bahaneya ‘kewto erey’ muracat qebul nêkerdbi.
Keyeyê Yenîyî dima reyna muracat kerd la reyna zî bi bahaneya ‘sebebê mergî eşkera nîyo’ muracat ame redkerdene. Dîya zanayene ke seba ke sebebê mergî bêro zanayene cenaza erşawîyaye Dezgehê Tipê Edlîyî (ATK) yê Stenbolî.
Dozgerîya Komare ya Pîranî 7 mengan ra dima cenaza teslîmê keyeyî kerde û keyeyî cenazaya Goristanê Bêkesan ra girewte û berde dewa Mûliksara ya Farqînî. Leşkeran dormeyê dewe girewt û nêverda ke çew tewrê merasîmê cenaza bibo. Wecîbeyanê dînîyan ra dima cenazaya Yenîyî ameye definkerdene.
Ame parekerdene ke keyeyê Yenîyî waşt şîn rono la leşkeran nêverdayo. AMED
