Li Îzmîrê êrîşkarekî bi çek avêt ser avahiya HDP’ê ya bajêr. Piştî ku agir berda avahiyê, xebatkara partiyê Denîz Poyraz qetil kir. Êrîşkarê bi navê O.G. hate binçavkirin. Li gorî nûçeya Ajansa Mezopamyayê (MA), parlamenterê HDP’ê yê Îzmîrê Mûrat Çepnî diyar kir ku êrîş yekser ji aliyê Wezareta Karên Hundir ve hatiye birêxistinkirin û wiha got: “Mîna êrîşa çend roj berê ya li dijî Navenda Giştî ya HDP’ê ya li Enqereyê hate kirin, ev êrîş jî rêxistinkirî ye. Em di demeke wiha de ne, desthilatdarî ji bo ji nava çala ku ketiye derkeve provokasyonên li dijî partiya me ji nû ve xistiye dewrê. Ji ber vê yekê em bang li gelê xwe dikin ku xwedî li HDP’ê derkeve û li dora HDP’ê bicive.”
Parlamentera HDP’ê ya Stenbolê Huda Kaya jî ev tişt anî ziman: “Mehên dawî me hewl didan li hemberî êrîşên bi vî rengî tedbîran werbigirin. Ji ber ku desthilatdarî bi xwe bûye tetîkkêş, bûye kujer.” ÎZMÎR
