Qezaya Pulurî ya Dêrsimî de Çimeyê Munzurî seba înşaatan, viraştişê keyeyan pêşkêşê şîrketan yenê kerdene. Meclîsê ‘Wa Munzur bi Azadî Biheriko’ vera babete nêrazîbîyayîşê xo pê eşkerayîyêka çepemenîye mojna. Eşkerayîye Çimeyanê Munzurî de ameye kerdene û Hemşaredarê Pêrî Orhan Çelebî zî tede xeylêk hemwelatîyî tewrê eşkerayîye bibê. Eşkerayîye hetê Serekê Baroyê Dêrsimî Kenan Çetînî ra ameye wendene.
Eşkerayîye de ame vîrvistene ke bêdestûrê hemwelatîyan pê îhaleya peyzajî warê Çimeyanê Munzurî û Halvorî yenê texrîbkerdene. Çetînî îfade kerd ke erazîyê zîretî yê Pulurî şîrketa înşaatî ya Koç Mercanî rê seba 49 serran ameyî kîrakerdene û dormeyê çimeyan pê telan yeno girewtene. Çetînî vat: ”Munzurî, Mercanî, koy, gir, ware, merkezê bawerî, dew, dewekî pêro binê îşxalê şîrketan de yê. Bi nê hawayî şar bênefes yeno veradayene. Nê kerdişan de rizaya ma çin a. Ma do destûr nêdê ke Çemê Pilemurîye, Çimeyanê Munzurî û Çimeyanê Halvorî de înşaatî bêrê kerdene. Ma do vera madenan, qedexeyê wareyan, talanê merayan rojêke ney her roje pê cinî, camêrd, ciwan, huqûqnas, muhendîs, hunermend têkoşîn bikerê.”
Hetê bînî ra Hemserekê Şubeyê Adana yê Komeleyanê Demokratîkan ê Elewîyan û Pîranê Ocaxê Şêx Çobanî ra Zeynel Keteyî zî derheqê mesele de nê çîyî ardî ziwan:
”Çimeyê Munzurî yê ke seba elewîyanê Rêya Heqî fîraz ê binê nameyê îstîhdamî de seba turîzm û madenî yenê texrîbkerdene. Şarê Dêrsimî no qet qebul nêkeno. Ganî elewîyî vera na neheqîye vajê Ya Xizir û têkoşîn bikerê. ” DÊRSIM
