Hêzên artêşa tirk a dagirker û çeteyên wê êrîşî gundê Um Işib ê di navbera Serêkaniyê û Dirbêsiyê de kir. Di heman demê de jî gelek çete, leşker û tank li gundê Zenûbiya yê Girê Spî bi cih kirin
Êrîşên dewleta tirk a dagirker û komên çete yên girêdayî wê êrîşên xwe yên li dijî rojavayê Kurdistanê didomînin. Tevî ‘agirbesta’ di navbera HSD’ê û dewleta tirk a bi navbeynkariya DYA’yê jî, hêzên dagirker bênavber êrîşî herêmê dikin û agirbestê binpê dikin.
Di vê çarçoveyê de hêzên artêşa tirk a dagirker îro saet 04.00’an de gundê Um Işib ê di navbera Serêkaniyê û navçeya Dirbêsiyê de topbaran kir. Çavkaniyên ji herêmê da zanîn ku li gorî agahiyên destpêkê, di encama topbarana artêşa tirk û çeteyên wê de şervanekî HSD’ê şehîd bû.
Liv û tevgera li Girê Spî
Hêzên dagirker duh jî li Girê Spî êrîşî şervanên HSD’ê kirin û di encama êrîşê de 3 şervanên HSD’ê şehîd bûbûn. Çavkaniyên ji herêmê ragihand ku îro jî saet 4:00’an serê sibehê de 2 helîkpoterên artêşa tirk daketin gundê Zenûbiya yê Girê Spî û piştre vegeriyan. Li gund tevgereke zêde ya artêşa tirk a dagirker û çeteyên wê hene. Bi taybet jî tevgereke zêde ya balafirên keşfê û tankan hene.
