Malbatên girtiyên di greva birçîbûnê û rojiya mirinê de rojiya xwe tenê bi av û xurme vekirin. Dayikan gotin ku zarokên wan birçî bin dê ew jî birçî bin
Bi pêşengiya HDP’a Amedê bi boneya meha Remezanê li Parka Roboskî ya Kayapinarê sifreya rûyê erdê hat avakirin. Parlamenterên HDP’ê Remziye Tosun, Musa Farisogullari, rêxistinên HDP û DBP’ê û gelek welatî beşdar bûn.
Beriya banga mele dayika bi navê Halîme Topuz a kurê wê Îhsan Topuz ku ji 1’ê Adarê ve li dijî tecrîdê di greva birçîbûnê ya bêdem û bêdorveger de ye axivî û ew bi rojî ne û zarokên wan li girtîgehan greva birçîbûnê ne û wiha got: “Loma em nikarin tiştekî bixwin. Zarokên me birçî bin em ê jî birçî bin.”
Piştre ji bo balkişandina ser grevên birçîbûnê di sifreya li ser rûyê erdê de rojî bi xurme û avê hat vekirin. Xizmên girtiyan ên ku rojiya xwe vekirin ji bo tecrîda li ser Rêberê Gelê Kurd Abdullah Ocalan rabe û grevên birçîbûnê bi dawî bibe dua kirin.
Piştre bi erbaneyê strana ‘Zindana Diyarbekir’ hat gotin û dirûşmên ‘ Bijî berxwedana zindanan’ û ‘Hemû der zindan in hemû der serîhildan in’ hatin berzkirin. AMED
