Endama Komeleya Jinên Azad ên Rojhilatê Kurdistanê (KJAR) Werîşe Mûradî ku bi sûcdariya ‘îsyanê’ bêyî ku were darizandin, ji 14 mehan zêdetire li Girtîgeha Evînê di kogûşa jinan tê girtin, li dijî darvekirinan 18 roj in di greva birçîbûnê ya bêdem de ye.
Piştgiriya ji bo çalakiya Werîşe Mûradî her ku diçe berfirehtir dibe. Medya rojhilatê Kurdistanê ragihand ku dayika Şerîfe ya ku kurê wê Ramîn Hisên Penahî di 8’ê îlona 2018’an de ji aliyê rejîma Îranê hatibû darvekirin, piştevaniya xwe ji bo çalakiya Werîşe Mûradî nîşan da.
Dayika Şerîfe a ku ket greva birçîbûnê wiha got: “’Ji darvekirinê re na’ nerazîbûnek di cih deye. Em li dijî kuştina bi qest a Îranê radiwestin. Ez dixwazim keça min Werîşe Muradî dest ji greva xwe berde. Îro şoreşa jinan a ji bo azadiyê pêwîstî bi jinên bihêz ên weke wê hene. Divê em bi hev re vê rêyê bimeşînin. Ez bi dil û can piştgiriya we dikim. Roja pênçşemê li gel têkoşerên sivîl ên rojhilatê Kurdistanê, li kêleka keça xwe Werîşe Muradî dest bi grevê dikim.”
