Rêxistinên Jinên Kurd ên li welatên Skandînavyayê ji bo xwedî li berxwedêrên greva birçîbûnê û rojiya mirinê derkevin dê her hefte çalakiyan pêk bînin
Berdevk û hevserokên rêxistinên jinên kurd ên li welatên Skandînavyayê, ji bo rêxistinbûna xwe xurt bikin û perwerdeya xwe pêk bînin, dawiya hefteyê li bajarê Uppsala yê Swêdê li hev civiyan.
Ji rêxistinên ji çar parçeyên Kurdistanê 35 jin tev li kombûnê bûn.
Lêkolîner Sûltan Oger li civînê axivî û diyar kir ku ji bo jin karibin hîn bêhtir xwedî li keda xwe derkevin pêwîstî bi perwerdeyê heye û wiha got: “Em hem jin in, hem jî koçber in. Em li welatê xwe nînin û divê em pêwîstiyên xwe diyar bikin. Jinên kurd ên ji neçarî koçî Ewropayê kirine, pirsgirêkên cuda dibînin. A sereke jî bandora jiyana li welatekî bi çandeke cuda ya li jinan e.”
Di civînê de rewşa li Tirkiye, Kurdistan û Rojava jî hatin nirxandin û têkoşîna jinan hatin nîqaşkirin.
Her wiha di civînê de jinan bal kişandin ser greva birçîbûnê û rojiya mirinê yên li dijî tecrîdkirina Rêberê Gelê Kurd Abdullah Ocalan hatine destpêkirin û biryar dan ku dê her hefte çalakiyan pêk bînin. UPPSALA
