Dewa Qerwêlûn Cêrî ya Çewlîgî de meseleya awe esta. Dewa bi 150 xaneyan de dewijî pê heywankarîye debara xo kenê. Dewe de meseleyê rayîr û çopan zî estê. Roje de yew saete awe dîyena dewe. Dewijî wazenê ke wa mesele bêra çareserkerdene.
Sultan Çakabaye pare kerd ke 20 serrî yo dewe de meseleya awe esta û vat: ”Selahîyetdarî ameyî la înan mesele çareser nêkerde. Dewlete goş nêdana meseleyanê na dewe.”
Zarîfe Çakabay vat ke dewlete mesele hal nêkenê, doman û camêrdî çem de xo şiwenê. Zarîfe vat: ”Awa ke dîyena zî pakî nîya. Domanê ma benê nêweş wexto ke ma înan benê nêweşxane doktorî vanê awe ra nêweş kewenê. Gereka na mesele bêra çareserkerdene.”
Nure Çakmak û Besrîye Çakabey bale antî ser ke meseleya awe reyde gereka meseleya rayîrî û kanalîzasyonî zî bêra çareserkerdene.
Dewij Bakî Çîçekî zî vat ke o semedê axpînê xo merkezî ra ameyo dewe la axpînê ci wişk bîyo.
Mehmet Çakabeyî pare kerd ke awa çimeyî û awa çemê têmîyan benê û vat: ”Cayo ke heywanî tira awe wenê awe yena. Ma çend reyî semedê çareserîya mesele muracat kerd la çew nêame. Meseleyê ma zaf ê la aya lezabeze meseleya awe ya. ” ÇEWLÎG
