Hêzê dagirkerî yê tirkan dewanê Reyhanîye û Menaxî yê Til Temirî ser o bombayan varnenê. Zaf cayan de şer qewimîyeno
Rejîmê tirkî ke 9ê teşrîna verêne ra nata hêrişanê xo yê dagirkerîye dewam keno. Hêzê dagirkerî yê tirkan dewanê Reyhanîye û Menaxî yê Til Temirî ser o bombayan varnenê. Zaf cayan de şer qewimîyeno. Hêrişan bi hawan û topan sate 11:30 de dest pêkerd. Dewê Menaxî û Reyhanîye bîyî hedefê bombardûmane.
Dewan de şerê giranî qewimîyenê
Heman wextî de dewanê Dirboyî û Kinebire yê Til Temirî de hêzanê Meclîsê Leşkerî yê Sûryanîyan cewab da hêrişanê dagirkeran û mabênê înan û tirkanê îşxalkeran de şerêko giran qewimîya. Saetanê serê sibayî de zaf dewî bîyî hedefê hêrişan. Dewê Qasimîye, Reyhanîye, Reşidîye û Azîzîye bîyî hedefê obus û hawanan. Heman dewî roja dişemeyî zî bîyî hedefê bambardûmane. Yeno vatene ke dewa Qasimîye de şerwananê Hêzê Sûrîyeya Demokratîke (HSD) cewab da hêrişan û herême de şerêko giran qewimîya.
Dagirkerîye, sucê şerî, sucê vera merdimîye
Dewleta tirkî ya dagirkere çeteyanê xo reyde 9ê teşrîna verêne de seba dagirkerîdişê hêrişê Rojawanî kerd. Çarçewa peymananê ke DYA û Rûsya reyde ameyî kerdene de dewleta tirkî zaf herêmî dagirker kerdî û bi seyan sivîlî qetil kerdî, bi se hezaran merdimî zî neçare mendî ke warê xo biteriknê. Gore raporanê rêxistinan înfazê kome zî tede zaf sucê şerî yê giranî ameyî kerdene. Îdareyo Xoser îfade keno ke çekê qedexekerdeyî sey gazê fosforî zî ameyî xebitnayene.
25 rojan de 200 hêrişî
HSDyî dişemeyî de bîlanço weşana û pare kerd ke mîyanê 25 rojan de dewleta tirkî tewr tay 200 rey hêrişê herême kerd. Merkezê Îrtîbatî yê HSDyî eşkera kerd ke 17ê teşrîna verêne wextê adirbirnayîşî yê mabênê Tirkîya û DYA ra nat adirbirnayîş hetê dewleta tirkî ra tewr tay 190 rey ame binpaykerdene. Beyanatî de ame parekerdene ke hêrişanê wextê adirbirnayîşî de 182 şerwanê HSDyî şehîd bîyî û 243 şerwanî zî birîndar bîyî. TIL TEMIR
