KNK bi boneya salvegera damezirandina xwe, li Hewlêrê bi nûnerên partiyên siyasî û derdorên cuda re civiya. Ji endamên KNK’ê Feryad Hîranî got ku Rojhilata Navîn di rewşeke krîtîk re derbas dibe û divê gelê kurd ji bo rewşa heyî hişyar be
Kongreya Neteweyî ya Kurdistanê (KNK) bi boneya salvegera damezirandina xwe, li avahiya Hizba Zehmetkêşan a Kurdistanê ya li Hewlêrê bi nûnerên partî û kesayetên başûrê Kurdistanê re civînek li dar xist. Di civînê de yekitiya neteweyî ya gelê kurd û rewşa niha Rojhilata Navîn bi berfirehî hate nirxandin.
Di civînê de gelek kesayet, partî û aliyên siyasî yên başûrê Kurdistanê jî amadebûn. Der barê mijarê de endamê KNK’ê Feryad Hîranî axivî û da zanîn ku wan di civînê de têkildarî kar û xebatên wan ên heta niha agahî parve kirine. Hîranî got ku wan xwest ku fikrên kesên beşdarî civînê bûyîn, ên der barê mijara neteweyî û parastina mafên kurdan ên li her çar parçeyên Kurdistanê de bigrin.
Hîranî destnîşan kir ku Rojhilata Navîn niha ber bi rewşeke metirsîdar ve diçe û divê di vê rewşê de gelê kurd baldar be. Hîranî bi lêv kir ku divê gelê kurd bi hostayî nêzî rewşê bibin da ku bikarin sûd wergirin. HEWLÊR
