Wendekara Unîversîteya Munzurî Gulîstan Dokuye 5ê çeleyî ra nata Dêrsim de vînbîyaye ya û tira xeberêke nêna girewtene. Xebatê cigêrayîşê Gulîstan Dokuye yê ke binê awe de ameyêne kerdene bi talîmatê Wezîrîya Karanê Zereyî 6ê temmuze de ameybî vindarnayene.
Keyeyê Gulîstan Dokuye 16ê temmuze de semedê pêrsayîşê aqibetê kênaya xo şi Anqara û Wezîrê Karanê Zereyî yê Tirkîya Suleyman Soyluyî de pêvînayîş kerd. Waya Gulîstan Dokuye, Aygul Dokuye ya ke derheqê pêvînayîşî de zanayîş da vat semedê cigêrayîşê waya aye do Aawbendê Uzun Çayirî bêro vengkerdene. Aygul Dokuye ard ziwan ke înan Soyluyî ra vato ke ê şikdarê ke kênaya înan ameya kiştene û vat înan ra ameyo vatene ke semedê şikdar Zeinal Abarakov qedexeyê vejîyayîşê teberê welatî esto û do îhtîmalê cînayetî ser o bêro vindetene. DÊRSIM
