Birayê girtiya siyasî ya kurd Pexşan Ezîzî, Aso Ezîzî der barê rewşa xwişka xwe de ku di rojên borî de Dadgeha Bilind ya Îranê cezayê darvekirinê erê kir, ji Radyoya Ferda re axivî.
Aso Ezîzî diyar kir ku ji bo bicihanîna cezayê darvekirinê yê Pexşan Ezîzî dosye ji daîreya înfazê ya ceza re şandine. Aso da zanîn ku parêzer daxwaza rûniştina dadgehê dikin, lê fikar hene careke din belgeyên ku parêzer pêşkêş bikin, li ber çav neyên girtin.
Her wiha birayê Pexşan Ezîzî, Aso Ezî got: “Pexşan Ezîzî endamtiya ti grubekê qebûl nekiriye. Îstixbarata Îranê jî di vî alî de ti belgeyek pêşkêş nekiriye. Tenê raporek lêkolînê di vî warî de heye. Ji aliyê saziyên ewlehiyê ve zext li ser dadwerê bilind tê kirin daku biryara darvekirinê erê bike.”
Aso Ezîzî diyar kir ku rêxistinên wekî Heyva Sor a Swîsreyê piştrast kirine ku Pexşan Ezîzî li Sûriyeyê tenê wekî karmendeke civakî bi xwebexşî kar kiriye.
