Wezîrê Xizîneyê yê DYA’yê Steven Mnuchîn da zanîn ku di lîsteya guşaran de wezîrê parastinê yê dewleta tirk Hulusî Akar, wezîrê çavkaniyên enerjî û xwezayî Fatîh Donmez û wezîrê karên hundir Suleyman Soylu hene
Piştî ku serokê DYA’yê Donald Trump ragihand ku dê biryarnameya serokatiyê ya ji bo guşarên li ser dewleta tirk îmze bike, Wezareta Xizîneyê ya Amerîkayê ragihand ku wan 2 wezaret û 3 wezîrên dewleta tirk xistine lîsteya guşaran.
Di daxuyaniya Wezareta Xizîneyê ya DYA’yê ev tişt hatin ragihandin: “Wezareta Parastinê ya Tirkiyeyê û Wezareta Çavkaniyên Enerjî û Xwezayî ya Tirkyeyê, her wiha wezîrê parastinê Hulusî Akar, wezîrê çavkaniyên enerjî û xwezayî Fatîh Donmez û wezîrê karên hundir Suleyman Soylu di lîsteya guşarên DYA’yê de ne. Destnîşankirina van wezaret û wezîran, encama tevgerînên Tirkiyeyê yên ji bo xerakirina aştî û ewlehiya herêmê ye. Ger ku hewce bike em amade ne ku hinek guşarên din jî li yên heyî zêde bikin.”
Wezîrê xizineyê Steven Mnuchin jî wiha got: “DYA, hikûmeta tirk weke berpirsyarê zêdebûna tundiyê, xistina sivîlan a talûkeyê û ji bêîstiqrarkirina herêmê dibîne.”
