Keça Leyla Guven ku ji bo rakirina tecrîda li ser Ocalan 75 roj in di greva birçîbûnê ya bêdem û bêdorveger de ye, Sabîha Temîzkan da zanîn ku dayika wê îro derneketiye hevdîtinê
Çalakiya greva birçîbûnê ya bêdem û bêdorveger a hevseroka Kongreya Civaka Demokratîk (KCD) û parlamentera HDP’ê ya Colemêrgê Leyla Guven ji bo rakirina tecrîda girankirî ya li ser Rêberê Gelê Kurd Abdullah Ocalan daye destpêkirin, di roja 75’emîn de berdewam e. Rewşa Guven a tenduristiyê her ku diçe xerab dibe û ji ber rewşa heyî nekarî derkeve hevdîtina bi malbata xwe re.
Hat zanîn ku îro keça Leyla Guven, Sabîha Temîzkan ji bo hevdîtina bi dayika xwe re çû Girtîgeha Tîpa E ya Amedê. Der barê mijarê de Temîzkan axivî û da zanîn ku dayika wê derneketiye hevdîtinê. Temîzkan li ser hesabê xwe yê twîtterê têkildarî mijarê peyamek parve kir û wiha got: “Cara yekemîn e ku dayika min derneket hevdîtinê. Kaxizeke bi nivîsa; ‘Li ser daxwaza xwe derneketiye hevdîtinê’ pê îmze kirine. Dayika min malava! Ka rehm! Divê ku pir xwestibe lê nakariye derneke. Îro 75 roj in birçî ye! #LeylaGuveniYaşatalim. Divê dayika min ne li girtîhê li meclisê be.” AMED
